AZIZ VOITOV JIZZAX VILOYATIDAGI QISHLOQ XO‘JALIGI OBYEKTLARIGA TASHRIF BUYURDI
![](/upload/pages/2022/09/13/2022-09-13-14-53-56-144710-4019122a8369c3f5540a0e7ce83fb3c6.webp?_=gzbol)
- 900
- 08.09.2024 04:47
2022-yil 10-sentyabr kuni O‘zbekiston Respublikasi qishloq xo‘jaligi vaziri Aziz Voitov Jizzax viloyatining Zomin, Zarbdor, Sharof Rashidov, G‘allaorol va Forish tumanlariga tashrif buyurdi. Qishloq xo‘jaligiga mo‘ljallangan obyektlarga tashrif doirasida vazir boshchiligidagi ishchi guruh tadbirkorlarning muammo va takliflari bilan batafsil tanishib chiqdi, zarur masalalar yuzasidan tegishli vazifalar belgilab olindi.
Vazirning ilk tashrif manzili Zomin tumanidagi “Agro finans lizing” AJ korxonasi bo‘ldi. Bugungi kunda korxonaning 500 gektar maydonida intensiv bog‘zorlar barpo etilgan. Bog‘larda olma, o‘rik, bodom, nok va nektarin mevali daraxtlari yetishtirilmoqda. Aziz Voitovga 112,6 gektar maydonda yaratilgan nokzorlar namoyish etildi. Bu yerda pakana bo‘yli, 6 xil “Abate-Fetel”, “Kaiser”, “Conference”, “Carmen”, “Williams”, “Max red Bartlett” navli nok daraxtlari parvarish qilinmoqda. Ishchi guruhga mevalarning holati, hosildorligi va isteʼmolchigacha yetkazib berishgacha bo‘lgan jarayon haqida maʼlumotlar taqdim etildi. Bundan tashqari korxona hududida 93 gektar maydonda agrouchastka barpo etilgan bo‘lib, unda pavlovniya plantatsiyalari o‘stirilmoqda. Qishloq xo‘jaligi vazirligi xodimlari ushbu agrouchastka bilan ham tanishib chiqishdi.
Zomin tumanidagi keyingi manzil “Barakali hosildor yerlari” fermer xo‘jaligiga tegishli piyoz maydonlari bo‘ldi. 25 gektarda tomchilatib sug‘orish tizimi orqali yetishtirilgan piyozning 1 gektaridan 100-110 tonnagacha hosil olinmoqda. Shuningdek, ushbu fermer xo‘jaligida qishloq xo‘jaligi mahsulotlarini saqlash omborxonasi mavjud. Sig‘imi 800 tonnalik omborxonada piyoz zahirasi yaratilmoqda.
Ishchi guruhi ushbu tumanda 2022-yilda tashkil etilgan “Zomin olam gullari” ishlab chiqarish kooperativiga tashrif buyurar ekan, issiqxonada yetishtirilayotgan gullar bilan tanishib chiqdi. Peshag‘or MFY da yashovchi 20 nafar gulchi ayol tomonidan tashkil etilgan ushbu kooperativ 15 gektar maydonga ega. 1,2 mlrd so‘mlik loyiha doirasida 100 ga yaqin ish o‘rinlarini yaratish rejalashtirilgan. Vazir bilan uchrashuv davomida fermer ayollarning gulchilikni rivojlantirish uchun ssuda ajratish, aholiga xizmat ko‘rsatish uchun kichik agrologistika majmuasini tashkil etishda amaliy yordam berish takliflari ijobiy hal etildi.
Zarbdor tumanida 35 gektarlik yerda joylashgan “Zarbdor Universal logistika” MCHJ korxonasiga borildi. Bu yerda 7 gektarda issiqxona, 15 gektarda mevali bog‘ mavjud. Aziz Voitovga 7 gektarlik issiqxonaning 1 gektarida tashkil etilishi rejalashtirilayotgan maxsus ko‘chatchilik maydoni loyihasi taqdim etildi. Unga ko‘ra, ushbu ko‘chatchilik issiqxonasida intensiv sabzavot va poliz ekinlari ko‘chatlari yetishtiriladi hamda Zarbdor va unga qo‘shni tumanlardagi aholi tomorqalari, fermer xo‘jaliklariga yetkazib beriladi.
Sharof Rashidov tumanida Oltinsoy hududidagi “Qo‘ychi ota” fermer xo‘jaligining g‘alladan bo‘shab, mosh ekilgan 10 gektar maydoni bilan tanishildi. Ushbu maydondan 25 tonna yalpi hosil olish kutilmoqda.
Ishchi guruhi shuningdek, ushbu tumandagi “Jizzaxkenteks” paxta-to‘qimachilik klasteri faoliyatini o‘rgandi. Klasterda ip-kalava ishlab chiqarish, qolaversa, boshqa qishloq xo‘jaligi obyektlari uchun paxta urug‘ligini tayyorlash yo‘lga qo‘yilgan. O‘rganish doirasida Jizzax viloyatining urug‘chilik markazlari rahbarlarining mavjud muammolari tinglanib, zaruriy vazifalar belgilab olindi.
Ishchi guruh Jizzax viloyati Sh.Rashidov tumanida “BMB-NRC Agrologistics” qo‘shma korxonasi tomonidan barpo etilayotgan zamonaviy аgrologistika kompleksi faoliyatini o‘rgandi.
Tashrif davomida ishtirokchilar аgrologistika kompleksi hududida tashkil etilayotgan tashqi iqtisodiy faoliyat bojxona posti va qishloq xo‘jaligi mahsulotlarini saqlash uchun mo‘ljallangan muzlatgich omborlari qurilish jarayonlari bilan yaqindan tanishdi.
Qishloq xo‘jaligi vaziri mazkur аgrologistika kompleksi qurilishi eksportchilar uchun bir qator qulayliklar, xususan, bojxona hujjatlarini rasmiylashtirish va mahsulotlarni qisqa vaqt ichida manzillariga yetkazib berishga sharoit yaratib bergan holda mamlakatimizda oziq-ovqat xavfsizligini ta’minlashga munosib hissa qo‘shishini alohida e’tirof etib o‘tdi.
G‘allaorol tumanidagi 105 gektar maydonga ega “G‘allaorol stone crushing” MCHJ korxonasi faoliyati o‘rganildi. Ayni kunda korxona hududida yer tayyorlash, shpaler o‘rnatish va tok ko‘chatlarini ekish uchun chuqur qazish ishlari olib borilmoqda. 2023-yilda 105 gektar lalmi yer maydonida tomchilatib sug‘orish texnologiyasini joriy etish orqali zamonaviy usuldagi intensiv tokzor barpo etilishi belgilangan.
Ushbu tumandagi so‘nggi manzil “Sag Agro G‘allaorol” MCHJ korxonasi bo‘ldi. Bu yerda 2019-yili lalmi yerlarni o‘zlashtirish hisobiga 800 gektar intensiv usulda yong‘oqzor barpo etilgan. Turkiya va AQSH davlatidan 192 ming dona “Chantler” navli yong‘oq ko‘chatlari keltirilib ekilgan va tomchilatib sug‘orish texnologiyasi joriy etilgan.
Aziz Voitov shuningdek, vazirlikning G‘allaorol tumanidagi qishloq xo‘jaligi bo‘limida mavjud sharoitlar bilan ham tanishib, bo‘lim uchun alohida bino ajratish hamda xodimlar mehnatiga haq to‘lash masalasini yaxshilash borasida ko‘rsatma berdi. Forish tumanida “Buyuk Javohir timsoli” fermer xo‘jaligiga tashrif buyurilib, 110 gektarda bodomzor tashkil etish loyihasi bilan tanishildi va buning uchun 3 mlrd so‘mlik imtiyozli kredit berish masalasi ko‘rib chiqildi.
Blog
![](/upload/pages/2022/07/22/2022-07-22-14-04-35-938571-31193244598a5b51c53a29a2126c1ee3.webp?_=gzb9y)
- 07.07.2024 20:07
Qishloq xo‘jaligi ishlab chiqaruvchilari paxta va g‘allani suvni tejaydigan sug‘orish sharti bilan qayta tiklanadigan energiya qurilmalari va ko‘chma elektr generatorlarini sotib olish xarajatlarining bir qismi uchun kompensatsiya oladilar. Hukumat qarori bilan sug‘oriladigan qishloq xo‘jaligi ye ...
![](/upload/pages/2022/11/25/2022-11-25-10-56-37-239361-6af39a6770321b672e1d96153d8ba875.webp?_=gzb9y)
- 16.07.2024 14:53
O‘zbekiston Respublikasi Prezidenti Shavkat Mirziyoyevning Fransiyaga tashrifi arafasida Parij shahrida ikki mamlakatning investitsion hamda savdo-iqtisodiy hamkorligini yanada kengaytirish maqsadida O‘zbekiston va Fransiya biznes-hamjamiyati o‘rtasidagi ishbilarmon doiralarning, hamkorlik aloq ...
![](/upload/pages/2023/03/03/2023-03-03-15-29-56-972494-0a1fc92c195d46fb57227711caaf800b.webp?_=gzb9y)
- 19.07.2024 08:47
2023-yilning 1-2-mart kunlari Toshkent shahrida “Qishloq xo‘jaligini raqamli transformatsiya qilish uchun tuproqni tayyorlash” milliy loyihasi doirasida seminar bo‘lib o‘tmoqda. Ushbu loyiha – O‘zbekiston Respublikasi Qishloq xo‘jaligi vazirligi hamda BMTning Oziq-ovqat va qishloq xo‘jaligi tashk ...
![](/upload/pages/2022/08/30/2022-08-30-12-12-20-358169-7a3d3ce141e0907c4c8d85106670f38e.webp?_=gzb9y)
- 19.07.2024 08:11
Prezident farmoni bilan Aziz Voitov qishloq xo‘jaligi vaziri lavozimiga tasdiqlandi. Shu munosabat bilan u investitsiyalar va tashqi savdo vazirining birinchi o‘rinbosari lavozimidan ozod etildi. O‘zbekiston prezidentining farmoniga muvofiq Aziz Botirovich Voitov qishloq xo‘jaligi vaziri lavozimi ...
![](/upload/pages/2022/08/16/2022-08-16-12-17-08-712057-12c21caf8ff151318990d5643237f588.webp?_=gzb9y)
- 18.07.2024 12:55
O‘zbekiston “Agrosanoat sohasida kooperatsiya va hamkorlik imkoniyatlari” mavzusida xalqaro konferensiya o‘tkazishni taklif qildi. Bu haqda seshanba kuni Toshkentda boshlangan ShHT ikkinchi iqtisodiy forumi doirasida Sputnik muxbiri xabar berdi. Ma’lumki, mazkur tadbir doirasida qishloq xo‘jali ...
![](/upload/pages/2022/06/07/2022-06-07-20-33-04-837465-57396adf3b68069885a497e93fced41d.webp?_=gzb9y)
- 19.07.2024 12:19
Keniya kelgusi kamomadni oldini olish uchun taxminan 540 metrik tonna oq jo'xori import qilish uchun uch oylik Oynani ochdi, deya yozadi Patrik Alushula portalda www.standardmedia.co.ke. Keniya davlat xazinasi oziq-ovqat xavfsizligini saqlab qolish maqsadida Sharqiy Afrika jamoatchiligidan tashqa ...