Maʼlumki, 2022-yil 27-iyul kuni O‘zbekiston Respublikasi Prezidenti tomonidan paxtachilikdagi dolzarb vazifalar muhokamasiga bag‘ishlangan yig‘ilish o‘tkazildi. Unda hududlarda g‘o‘za parvarishidagi mavjud xato va kamchiliklarni o‘z vaqtida bartaraf etish, so‘nggi kunlarda kuzatilayotgan anomal issiq haroratning g‘o‘zaga salbiy taʼsirini yumshatish, yaratilgan hosilni saqlab qolish maqsadida hosilga hosil qo‘shish uchun “Dolzarb 30 kunlik” eʼlon qilindi.

Ushbu oylik doirasida g‘o‘za parvarishida quyidagi agrotexnik tadbirlarni amalga oshirish muhim hisoblanadi:

Birinchidan, mavjud kultivatorlarni to‘liq ishga jalb qilgan holda, har bir sug‘orishdan keyin tuproq yetilishi bilan kultivatorlarni “baliq sirti” qilib o‘rab, himoya obtekatellarini o‘rnatgan holda, ertalab va kechki soatlarda kesak hosil qilmasdan mayin nam kultivatsiya qilishni yo‘lga qo‘yiladi.

Ikkinchidan, g‘o‘zaga stimulyatorlar va mikrobiologik o‘g‘itlar bilan ishlov berish uchun mavjud barcha purkagichlar kechki soat 19:00 dan keyin ertalab 7:00 gacha ishlashi tizimli tashkil etiladi.

Uchinchidan, viloyat va tumanlarda barcha texnikalar tizimli ravishda mahalliy o‘g‘it jamg‘arish va fekal chiqarishga safarbar qilinadi.

Hududlardagi mahalliy o‘g‘itlar sug‘orilayotgan dala maydonlariga olib chiqishi tizimli tashkil qilinadi.

To‘rtinchidan, g‘o‘zani sug‘orishda suvchilar soni 2-3 martaga oshiriladi, ularga dalada barcha sharoitlar yaratilib, tungi sug‘orishga alohida eʼtibor qaratiladi.

Sug‘orilayotgan har bir maydon, albatta, sharbat usulida sug‘orilishi, sug‘orishni qisqa o‘q ariqlardan foydalangan holda hamda mavjud egiluvchan quvurlar orqali amalga oshirish yo‘lga qo‘yiladi.

Xususan, kam suv bilan, tez-tez suvni ko‘llatmasdan, imkon qadar taktli usul bilan jildiratib sug‘orish amalga oshiriladi.

Shuningdek, paxta maydonlarida egat oralatib yengil sug‘orish natijasida, qisqa muddatlarda peshma-pesh barcha paykallar namlab olinadi.

Dalada suvni uzoq oqizib va zovurga tashlab qo‘yish qatʼiy nazoratga olinadi.

Beshinchidan, joylarda suvni to‘g‘ri taqsimlash va monitoring qilish “shtablari” tashkil etiladi va mavjud suvdan samarali foydalanish tizimi yo‘lga qo‘yiladi.

Suv oldindan rejalashtirilgan va tasdiqlangan grafiklar asosida g‘o‘za, takroriy ekin va tomorqalarga o‘z vaqtida yetkazilishi uchun suv shtablarining shaxsan javobgarligi oshiriladi.

Oltinchidan, g‘o‘zani zararkunandalardan himoya qilish bo‘yicha uyg‘unlashgan kurash choralari ko‘riladi.

G‘o‘za maydonlariga har 2 gektarga 1 donadan yangi feromon tutqich o‘rnatib va ko‘sak qurti kapalaklari tuxumiga qarshi gektariga 1-1,5 grammdan trixogramma biomahsulotini kechki salqinda tarqatish yo‘lga qo‘yiladi.

Ko‘sak qurti tuxum qo‘ygan maydonlar alohida nazoratga olinib, 100 tup g‘o‘zaga 5-6 dona ko‘sak qurti lichinkasi to‘g‘ri kelgan holatda tavsiya etilgan kimyoviy preparatlar va kam tarqalgan maydonlarda brakon entomofagi gektariga 1000-2000 donadan tarqatiladi.

Har 100 tup g‘o‘zada 20 tadan 30 tagacha qandala tarqalgan maydonlarda ichdan va sirtdan taʼsir etuvchi preparatlar bilan kimyoviy ishlov berish yo‘lga qo‘yiladi.

G‘o‘za maydonlarida o‘rgimchakkanaga qarshi maxsus akaritsidlar bilan 3 marta har 6-7 kun oralatib suv bilan yuvish tashkil etiladi.

Yettinchidan, g‘o‘za maydonlarida yalpi chekankani to‘liq yakunlash choralari ko‘riladi.

G‘o‘zani ko‘saklash fazasida gektariga 90 grammdan o‘simlik o‘sishini boshqaruvchi mepikvat-xlorid asosli (Sojean, Entojean, Ximjean) regulyatorlar bilan ishlov beriladi.